MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
363
Item het was een vrou van Delft, die haer borst bestont te sweeren, alzo verveerlick, dat die meijsters diese saghen, seijden dat zij ontfangen waer van Sint Anthonis vuijer ende oock die kancker. Ende als haer die meijsters anders nijet en rieden, dan off te snieden, loeffde zij haer bevaert t’ Amersfoert. Ende nae iiij daghen quam zij en dede haer bevaert. Ende die borst wert gesont sonder meijstere.
364
Iten het was een knecht van Bunschoten, die een waghen dreeff, daer hem een pijn aen in allen zijn leden ende sonderlinghe in zijn beenen, alzo dat hij wel viij weecken te bedden lach in groter cranckheijt, ende naer begont te gaen op crucken. Hij loeffde zijn bevaert t’ Amersfoert ende te hant quam hij des anderen daghes tot Onse Vrouwen en dede zijn bevaert ende liet hier zijn krucken mit blijschappen.
365
Item het was een man vuijt Holland, die een aposteem had sweeren in zijn lochter zijde bij zijn hart tusschen die corte ribben, een iaer lanck, daer hem die meijsters, die aposteem niet steecken en dorsten. Hij loeffde zijn bevaert tot Onser L. Vrouwen ende binnen iij daghen quam dat zeer buijten, ende wert gesteecken ende geheelt.
366
Item het was een kijndt van Delft van ij jaeren, dat een halff jaer seer beroert had geweest vande saech, alzo dattet seer cranck wert ende ter doot waert reijde. Die moeder heeft haer bevaert geloeft tot Onse L. Vrouwen, ende nae die tijt is dat kijndt gebetert ende van die saechghe verlost.
