MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
370
Item het was een man vander Goude gevangen ende in een stock gesloten, daer die vrienden gelt ombooden ende zij mochten nijet chriegen. Hij riep aen Onse l. Vrou ende loeffdese t’ Amersfoert te versoecken. Ende doe heeft hij reeschap gechregen, dat hij vuijt een veijnster quam, dat vij vadem hoech was. Ende hij is hier gecomen ende heeft zijn bevaert gedaen.
371
Item het was een wijff van Putten, die haestelicken zieck wert ter doot toe, alzo dat haer dat vriesem vuijt sloech, ende die mont haer all slim toech. Doe loeffden, die bij haer waren, haer bevaert tot Onse L. Vrou. Ende zij is weder tot haer selven gecomen ende gesont geworden.
372
Item het was een man in die Spaensche zee roerloos geworden. Hij loeffde zijn bedevaert tot Onse Lieve Vrowe tot Amersfoert ende hij is behouden te landt gecoemen.
373
Item het was een man vuijter Drenten, die geprueft was, dat hij melaetsche soude geweest hebben. Hij loeffde zijn bevaert, dat hij hem soude laten weghen voer Onse L. Vrouwen beeldt. Ende hij is weder gesont geworden ende gereijnicht van zijn lazarie.
374
Item het souden vijff gesellen varen vanden Briel in een cleijn out schipken. Daer quam haer een wijndt aen, diese iaechde in die zee. Ende het schipken chreech vijff groote gaten, alzo dat zij haer biecht spraecken tegen d’ ander. Doe worden zij denckende op die grote ghenade, die tot Amersfoert Onse L. Vrou daechgelicxs toende. Zij loeffden haer bevaert ende nae dien quam geen water meer int schipken boven een halff voet diep. Ende het gijnck door die golven, als oft op een ijse gegaen hadde. Ende die gesellen zijnt weder behouden ten Briel in die haven gecomen
