MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
374
Item het souden vijff gesellen varen vanden Briel in een cleijn out schipken. Daer quam haer een wijndt aen, diese iaechde in die zee. Ende het schipken chreech vijff groote gaten, alzo dat zij haer biecht spraecken tegen d’ ander. Doe worden zij denckende op die grote ghenade, die tot Amersfoert Onse L. Vrou daechgelicxs toende. Zij loeffden haer bevaert ende nae dien quam geen water meer int schipken boven een halff voet diep. Ende het gijnck door die golven, als oft op een ijse gegaen hadde. Ende die gesellen zijnt weder behouden ten Briel in die haven gecomen.
375
Item het was een beghijn van Tijel uute cleijne cloester van Sint Agnieten, die lach in haer kerkcken op Sint Peters dach, doe men die Laudes sanck vande metten. Daer wert zij mit ooghen blijnt. Zij loeffde haer bevaert tot Onse L. Vrouwen ende tehant is zij mitten eenen oghe weder siende geworden. Ende voert is zij gecoemen voer dat beeldt Onser L. Vrouwen ende heeft haer gebet gesproecken, als een hijmnum die Ave maris stella Dei mater alma heet. Ende doe wert zij weder siende mit den anderen oghe, dat zij doe alzo wel sach, als zij ije gedaen hadde.
376
Item het was een vrou van Nimmghen, die ij iaer all doeff geweest had, alzo dat zij niet en horde. Haer wert te kennen gegeven dat zij haer bevaert loven soude tot Onse L. Vrou t’ Amersfoert. Ende doe zijt gedaen, wert zij daer nae binnen twe weecken weder hoorende.
