MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
377
Item het was een vrou in Langebroeck, die in een water haer cleder soude wasschen. Ende zij had bij haer een kijndt van iij jaeren, dat in een diepe grave viel, daert wel ene halff ure in verdrincken lach, eert die moeder vernam. Doe wert zij siende een stuck van zijn clede ende meenden dattet een laecken geweest hadde. Zij ghijnck daer bij en sach het, dattet haer kijndt was. Doe toech zijt vuijt mit schreijen ende brachten te huijs. Doe quamen daer haer buren ende seijden, dat zij haer bedevaert tot Amersfoert loven soude miten kijnde. Te hant over een lange wiele wert dat kijndt schreijende ende wert gesont.
378
Item het was een vrou vuijt vrieslandt, die genesen was van een kijnde. Dese was in een zukert gevallen, alzo dat die meijsters haer t’lijff ontseijden ende wel xj weken in haer kraem, alzo dat zij seer mismoedich was, wert zij slapende. Daer quam haer voer in haer visioen een schoene maghet, die haer seijde: “Loeft u bevaert t’ Amerfoert, ghij en sult van deze zuket niet sterven.” Ende men helt haer wel vj werven die keerse in haer handen, dat zij nochtans sprack: “Maria heeft mij geloet dat ic van deze zuucten niet steven zall.” Te hant heeft zij haer bevaert geloeft ende zij is sonder enighe medicijnen gesont geworden.
379
Item het was een knecht van Bunschoten, die een waghen soude drieven, daer hij op beroert wert, alzo dat hij handen ende voeten bestont te slaen. Ende hij wert cruepel, dat hij seven weecken te bedde lach. Hij loeffde zijn bevaert tot Onse L. Vrou t’ Amersfoert ende te hant bestont hij op krucken te gaen ende nae vlijff daghen quam hij tot Onse L. Vrou ende offerden zijn krucken machtich ende gesont.
