MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
379
Item het was een knecht van Bunschoten, die een waghen soude drieven, daer hij op beroert wert, alzo dat hij handen ende voeten bestont te slaen. Ende hij wert cruepel, dat hij seven weecken te bedde lach. Hij loeffde zijn bevaert tot Onse L. Vrou t’ Amersfoert ende te hant bestont hij op krucken te gaen ende nae vlijff daghen quam hij tot Onse L. Vrou ende offerden zijn krucken machtich ende gesont.
380
Item het was een man van Oudekerkcken bijder Goude ende sat op een waghen mit coorn. Deze viel om in een holen sloet ende die man beviel daer onder, daer hij een halff ure lach. Doe die luden dat coorn vuijt die sloet soude nemen, vonden zij den man versmoert. Die waghenknecht loeffden hier zijn bevaert, ende in een halff ure ontwerpt hij weder ende hij quam en dede zijn bevaert.
381
Item het waren ij gesellen van Zantvliet gevangen te Boemel viij weecken lanck, op haer lijff. Zij loeffde haer bevaert ten heijlighen bloede ende tot Onze L. Vrou te Aerdenburch. Doe quamen die buren, die haer seijden: “Lovet u bevaert t’ Amersfoert, ghij sult well verlosset werden.” Zij loeffden haer bevaert tot Onse L. Vrouwen ende zij worden verlosset. Ende zij quamen en deden haer bevaert mitten ijser, daer zij mede gesloten waren.
382
Item het was een cureijt vuijt Vrieslandt, die gecregen had een aposteem onder zijn harte, dat hem geen meijster dorste steecken. Ende corts daer nae wert hij beroert vander popelzie, dat hij in sijnen voeten lam wert, alzoe dat hij in X weecken nije misse en dede. Hij loeffde zijn bevaert t’ Amersfoert, hem daer laten te weghen. Ende te hant swoer dat aposteem doer zijn corte ribben ende wert van buijten geheelt. Hij heeft zijn bevaert gedaen ende liet hem weghen eens priesters misse gewaede ende binnen een ure daer nae wert hij alzo sterck, dat hij hem aen dede. Ende dede misse voor Onse L. Vrouwen beelde machtich ande gesont.
