MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
390
Item het was een vrou, die ene kijndt had, dat zijn been benden zijn knije dicker was dan zijn dije. Ende hem was oock op zijn lenden een groot stuck vleijssches gewassen. Die moeder loeffde haer bevaert t’ Amersfoert mitten kijnde te doen binnen eenre tijt. Des is die knecht gesont geworden. Ende als die tijt quam, datdie moeder die bedevaert doen soude, vergat zij dat te doen. Ende doe wert dat kijndt te hant doeff. Doe quam die moeder mitten zoon, die bevaert te doen. Ende doe zij in die weghe waren, wert het weder hoorend ende gesont.
391
Item het was een wijff van Zutpheen, die een kijndt had van iij jaeren. Dat vant zij leggen up een brouketel, daer wel vij emmer waters in waren. Dat kijndt was stijff ende cout. Ende die moeder en wist niet, hoe lange dattet daer inne geweest had. Die moeder loeffde haer bevaert tot Amersfoert mit haerer buren. Ende dat kijndt wert terstont levendich ende wel te passe.
392
Item het was een maghet van Utrecht beseten alzoe, dat zij haer selven sloech ende beedt. Ende oock haer ouderen ende in iij daghen niet en hadde gegeten noch geslapen Die ouders loeffden haer bevaert mitten maghet tot Amersfoert ende doe bestont zij terstont te rusten ende sprack daer nae: “Ic wil tot Onse L. Vrouwe wesen tot Amersfoert.” Ende doe zij mit haer ouders daer quam, wert zij seedich ende att ende dranck ende wel te pas.
393
Item het was een knecht vuijt Vrieslandt ende wert gevangen om een misdaet, diese zijn vader betegen mit onrecht. Ende zij wouden dat dese knecht soude voldoen voer zijn vader. Ende hij wert gesloten om zijn beenen mit groote boeijen. Ende voerts wert hij gesloten aen een groot block mit een grote ijsere bout. Ende lach soe gesloten wel ij weecken lanck. Ende doe quam daer een vroutgen, dIe had medelijden mit hem, dan conde hem niet helpen. Maer zij seijt hem van genade die Onser L. Vrouwe tot Amersfoert dede eNde dat hij zijn bedevaert soude loven. Zij mocht hem helpen. Ende als hij dat gedaen had, vant hij een cleijn mesken omtrent zijn bedde, dat hij daer te voeren niet gesien hadde. Ende daer mede snee hij die ijseren bout ontwee ende quam soe wech ende heeft zijn bevaert gedean, als hij geloeft had. Ende hij heeft dit selver geseijt. Ende had oock een breeff van zijn cureet, dat dit waerachtich aldus geschiet was.
