MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
393
Item het was een knecht vuijt Vrieslandt ende wert gevangen om een misdaet, diese zijn vader betegen mit onrecht. Ende zij wouden dat dese knecht soude voldoen voer zijn vader. Ende hij wert gesloten om zijn beenen mit groote boeijen. Ende voerts wert hij gesloten aen een groot block mit een grote ijsere bout. Ende lach soe gesloten wel ij weecken lanck. Ende doe quam daer een vroutgen, dIe had medelijden mit hem, dan conde hem niet helpen. Maer zij seijt hem van genade die Onser L. Vrouwe tot Amersfoert dede eNde dat hij zijn bedevaert soude loven. Zij mocht hem helpen. Ende als hij dat gedaen had, vant hij een cleijn mesken omtrent zijn bedde, dat hij daer te voeren niet gesien hadde. Ende daer mede snee hij die ijseren bout ontwee ende quam soe wech ende heeft zijn bevaert gedean, als hij geloeft had. Ende hij heeft dit selver geseijt. Ende had oock een breeff van zijn cureet, dat dit waerachtich aldus geschiet was.
394
Item het was een knechtgen, dat soude t’ Amsterdam die papegaeije sien scheten. Ende die mast, daer die papegaeije opstont, die viel neder ende viel dat knechtgen op zijn hoeft, soe datttet wel ij uren lach, dat die geen, die daer bij waren, die en wisten anders niet, dan dattet doot was ende geloeffden haer bevaert tot Onse L. Vrou t’ Amersfoert. Ende dat knechtgen begont hem te roren ende wert weder gesont. Ende zijluden zijnt hier te samen gecomen, wollen en bevoets, mit dat knechtgen ende hebben haer bevaert gedaen. Ende Onse L. Vrou geloeft ende gedanckt.
