MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
395
Item het was een jonckman van Nout Derhout die wert op Onse L. Vrou lichtmis dach inden jaer van vijftich (1450) seer gewont dat hij hem niet roren en mocht ende lach daer toe iij daghen sonder eeten ende spreecken, die datmen luttel vermooden had van zijn leven. Doe loeffde zijn moeder haer bevaert tot Onser L. Vrouwen t’ Amersfoert, d’selffde mit hem te versuecken, mocht hij genesen. Ende alzo vroech als zijn moeder dit geloefft hadde, soe sprack hij, die in iij daghen nije gesproecken en had. Ende begeerde van zijn moeder drincken te hebben. Ende hij genas cortelick. Ende hij is gecomen mit zijn moeder ende heeft zijn bevaert gedaen.
396
Item het was een man woenede bij Ouwarer ende hadde een waghen off een voeder mit coorns, daer een vrouspersoon op sat. Ende die waghen m it den coorn viel om, soe dat die vrou viel in een diepe Grave ende t’koorn op haer lichaem, soe dat zij all doot was. Ende diem man looffde zijn bevaert tot Onse L. Vrou t’ Amersfoert, doe zij wel anderhlaff ure doot geweest had. Ende zij wert weder levendich.
397
Item het was een man bij Zutpheen, die had vij jaeren gebroecken geweest ende hij konde binnen die vij jaeren geen raedt noch gesontheijt chriegen. Daerna loeffde hij zijn bevaert Onse Lieve Vrou t’ Amersfoert te versuecken mit een silvere krues. Ende hij wert mirakelick gesont.
