MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
401
Item het was een kijndt van Nimmegen, alzo gequelt mit den
steen, dat d'ouders daer groot iamer aen saghen. Zij loeffden
haer bevaert t'Amersfoert. Ende het kijnt is genesen.
402
Item het was een kijndt van Zutpheen en had een levende pos
in zijn keel, also dattet all doot
lach verstickt, want die pos en mocht noch vuijt, noch inne. Ende zij en wisten geenen raedt dan alleen aen God ende zijn lieve Moeder. Ende zij hebben haer bevaert geloeft allhier tot Onse L.Vrou. Ende dat kijndt wert hoestende ende schoet des pos ten hals vuijt. Ende zij hebben dat kijndt allhier laten weghen mit wijn ende mit weijt all gesont.
403
Item het was een iongesel van Ouwerkerck, ende was varen visschen in een groote diepe meer. Ende hij viel over boert ende die schuijt dreeff hem over thoeft. Ende hij en wiste anders niet, dan hij drencken most. Ende hij wert denckende op Onse L. Vrouwe t'Amersfoert. Terstont quam hij op ende die schuijt quam aen zijn handt ende hij quam daer in ende wist niet hoe. Ende hij heeft allhier geweest ende heeft zijn bedevaert gedaen.
404
Item het was een kijndt vander Goude van iij jaeren, twelck was seer becoemert mitten steen, alzo dattet an achten daghen zijn water maeckten. Ende zij loeffden haer bedevaert all hier te weghen. Ende terstont hevet dat kijndt zijn water gemaeckt ende was gesont.
