MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
404
Item het was een kijndt vander Goude van iij jaeren, twelck was seer becoemert mitten steen, alzo dattet an achten daghen zijn water maeckten. Ende zij loeffden haer bedevaert all hier te weghen. Ende terstont hevet dat kijndt zijn water gemaeckt ende was gesont.
405
Item het was een wijff vuijten Briel, ende had een alten quaden been, alzo dat haer niemant raedt en wist. Zij loeffde haer bevaert tot Onse L.Vrou s Gravesandt ende noch tot een stede ende zij vant geen baet. Doe loeffde zij haer bevaert allhier tot Onse L.
Vrouwe ende terstont was zij genesen.
406
Item het was een kijndt van Huusen, ende was van die moeder
geloopen, alzoe dattet viel in een vonder ende was daer verdroncken, alzo dat zijt sochten lange tijt, alzo dat zijt vonden all verdronken. Daer lacht langer als een ure voor doot. Ende alzo drae, doe zij haer bevaert loeffden tot Onser L.Vrouwen allhier te weghen mit weijt, vlas ende wasch, doe wert het weder levendich.
407
Item het was een gesel vuijt Westphalen, ende was gevangen bij Oldenburch van die grave van Benthem ende hij lach, daer in een hoghe diepe toorn xx weecken lanck, alzo dat daer voor hem schreeff een heer van Gelre ende den heer van Cleeff ende abdis van Elten. Ende ten halp all niet, alzo dat hij viel aen Onse L.Vrou t'Amersfoert ende hij en hadde niet daer hij hem mede behelpen mocht, dan stroeij. Daer maeckte hij off een coerde. Dat worp hij boven in dat wolft vanden toorn ende daer bij soe haelde hij hem op dat wolft. Ende nu wast noch IX vadem te veijnster vuijt te gliden. Ende hij en hadde geen touwe bij hem. Dan hij schoerde zijn hemde ende all zijn cleder en stucken ende bandt dat te samen ende alzo glede hij neder, also veer alst reijcken mocht, ende viel voert neder op die aerde, all naeckent, ende stack hem door.
