MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
408
Item int jaer van Lvj op den heijlighen Karsavont bij daghe op der zee worden gevangen twe schipmans vanden Briel en worden in Zantwijck in Engelant in die stock geleijt ende mit iij sware ijseren banden geleijt, als omden hals ende dat middel haers lijffs ende die voeten. Ende soe laghen zij tot op Meij avont inder nacht. Ende zij loeffden Onse Soete Vrouwe van mirakel t'Amersfoert, eer zij t'huijs quamen, haer bedevaert te doen. Ende terstont soe ontspronghen alle die banden ende d'stock wert loes, sonder handen off enighe instrumenten. Ende vonden iij doeren open ende oock die poorte van die stede. Ende ghijngen vrie ende los, sonder iemants lettel of hijnder. Ende hem ghijnck voer in een manier een keerslichte. Oerconde der waerheijt doe hebben dese twe als Peter Jacobsz, Hein Gerritsz nu op Woensdaghe nae S.Servaesdach haer bedevaert volbracht te vijff uren naeder vespertijt ende d'voerseijde ijzeren banden en souden iiij mannen niet moegen dragen. Daer Godt ende Maria off gelovet moeten zijn. Amen.
409
Item het was een man van Westphalen, ende sat gevangen int lant van Marck van S.Marten tot Meij toe mit grooten swaren boeijen om zijn beenen. Ende hem verdrote ten lesten seer daer te sitten. Ende hij en wiste geenen troost. En hij loeffde zijn bevaert Onse L.Vrou t'Amersfoert. Ende terstont vant hij een elsem ende een cleijn spiker. Daer stack hij d'grote boeijen mede van zijn been ende vrieden hem selven vuijt allen slooten. Ende hij sach alle die dooren van die toorn open staen, ende die bruggen waren nedergeleijt. Ende hij quam vrij ende los voer Onse L.Vrou tot
Amersfoert. Ende heeft zijn bevaert gedaen ende heeft dat reeschap, daer hij het mede ontstack voer Onser Liever Vrouwen gehangen.
410
Iten int jaer M,ccccLvij doe was een kijndt van iij vierendeel iaers in Vrieslandt op Marderen landt geheeten Tijndel, dat was blijnt lange tijt, alzo dat hem dat bloeit vuijt zijn oghen liep, gelijck als aderen, alzo dat hem geen menschelick troost, off hulpe stade en dede. Soe hebben zij dat kijnt mit een offerande geloeft tot Amersfoert Onse L.Vrou. Ende dat kijnt is sijnre oghen gesont ende well siende geworden. Dat dit waer is, des heeft getuijchenis gegeven eijgelick die kerckheer des karspels voerseijt.
