MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
412
Item het waren iiij scheepgesellen vander Veer mit een ionghe, die in Engelandt scheepten veel grote wijndel steenen, daer die smede haer bijlen op slijpen. Ende als zij in die zee waren, soe quam daer een groot sturm, soe dat het schip te gronde ghijnck, soe dat haer mast niet dan een luttel boven te sien was. Ende zij vielen in een boetken dat seer snoe was ende aenriepen Onse L.Vrouwe inden hemel ende loeffden haer bevaert te versuecken tot Amersfoert voer Onser L.Vrouwen beeldt van mirakelen ende bevalen Onse L.Vrou haer siel ende lijff. Ende zij sijnt in Zeelant te lande gecomen ende daer soe gaven zij dat boetken voor vijff stuvers. Ende hebben haer bevaert gedaen des Maenendaechs nae S.Jan baptista int jaer van Lvij.
413
Item het was een kijndt in die stadt Brugge verdroncken, alzo dattet wel iiij uren doot lach, alzo dat zij brochten in Onser L.Vrouwen kercken te Brugge ende leijdent op den outaer mit bidden ende mit schreijen. Maer t'kijndt dat bleeff all doot. Doe was daer een priester ende seijde:"Lovet u bevaert ,t'Amersfoert, ick heb daer alzo veel off hooren segghen. Ende oock heeft zij mirakel gedaen in Onser stadt van Brugge. Macht geschien, zij zall u gracie doen". Ende die man loeffde zijn bevaert in een hemde te doen ende terstont wert dat kijndt levendich. Ende die man heeft allhier zijn bevaert gedaen.
414
Item Anno LIX was een man omtrent van xxx jaeren, heer Jans neve van Alphen, Ridder des landts van Cleve, die wert gevangen van Jonck'Gerrit van Oldenburch. Daer sat hij iij iaer in swaere gevanckenis, noch hij en mocht om geen redelick goet, des hij machtich was, gequiteert worden. Doe dede hij zijn gebet met ganser betrouwen tot Onser L.Vrou. Des nachts nae quam hem in zijnen visioen te voeren, dat hij zijn bevaert t'Amersfoert doen solde in eer Onser L.Vrouwen mit sijnre offerhande. Inder naester nacht, als hij die gelofft had gedaen, ontsprongen alle ijseren banden ende sloten ende dooren des gevanckenis. Ende quam t'Amersfoert ende dede zijn bevaert ende betaelde zijn gelofte mit een wasschen toorn.
