MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
419
Item dese voerseijde vrouwe had een kijndt van acht jaeren, dat haestelick gebreck chreech in zijn been des nachts, also dattet smorgens gaen noch staen en konde. Ende zij loeffde Onse L.Vrou een wasschen been te offeren mit haer kijndt. Ende dat kijndt is gesont geworden. Ende zij heeft mit haer zoon hier geweest ende danckte d'maghet Maria.
420
Item het was een vrou vuijt die Betauwe van Elst, die overmits haer eijgen zuuckt een bedevaert dde voer Onser L.Vrouwen beelde. Ende zij vant daer hangen veel leijnden banden, daer zij nae vraechden, wat zij beduden, alzo dat haer geantwoerdt wort, dattet gebroecken luden geloeft hadden ende gracie verworven hadden van Onse L.Vrou. Alzo dat dese vrou voerseijt een zoen had, die gebroecken was binnen iij jaeren ende iij jaeren dat gebreck gedragen had. Dese vrou loeffde Onse L.Vrou te versuecken mit haeren zoon, offerende een betamelicke offerhande mit den wijndenier haers zoens. Ende als zij t'huijs gecomen is, heeft zij haer kijndt ontboden ende vant dat gesont. Ende nae die tijden is gesont gebleven. Ende heeft haer bedevaert mit haer zoen gedaen voer Onse L.Vrou des saterdachs nae S.Odulphus dach.
421
Item het was een man van Loechum, die mitter popelzije seer geslagen was, alzo dat hem zijn mont bij nae aen zijn ooren gespannen was. Also dat hij loeffde Onse L.Vrou te versuecken mit een wasschen hoeft. Ende nae die beloften, binnen vier uren, wert hij weder gesont. Ende heeft zijn bevaert gedaen voer Onse L.Vrou, haer danckende, omtrent S.Bonifaes dach.
