MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
423
Item het quam een man vuijt Brabant, ende woude zijn bedevaert t'Amersfoert Onser L.Vrouwen doen. Ende inden wech off reijse t'Onser L.Vrou wert, moetende hem vier gebroederen, welcke broederen haerre vader offgeslagen was vanden vader des mans voerseijt. Ende die iiij gebroederen chregen kennisse des voerseijden mans, als dat hij dat naeste bloeit was tot den geenen, die haer vader geslegen had. Ende omghijngen hem mit wapenen om haeren vader aen hem te vreecken. Ende seijden:"Nu zijt ghij op die stede, daer ghij sterven sult; want u vader heeft onse vader geslagen". Ende dese man, zeer beanxt, is achterwaerts getreden en geweecken aen eenen boem, daer hij zijn betrouwen alleen in die Moeder der Bermharticheijt geset heeft, mit opreckende handen aldus spreeckende:"O Maria, ghij weet, dat ick in weghe ben U te versuecken. Wilt aen mij nu thoenen u barmharticheijt, op dat ick u versuecken mach. Ick wil u pilgrim bliven iaerlicxs u versueckende buijten noetsaecken, de daghe mijns levens, in linne cleder."Ende Onse L.Vrou heeft hem bedeckt van den oghen ende gesicht deser vier broederen, dat zij hem niet en konden sien, daer hij voer haer stont aen den boem, um deser voerseijden loften t'Onser L.Vrouwen. Ende hebben gevloeickt, vermalediende den man, niet weetende , waer hij gebleven was. Ende als zij hem niet vijnden noch sien en konden, sijnt zij van dier steden gegaen, hem soeckende. Ende dese man is mit groter devotien t'Amersfoert gecomen in die vaert Onser Liever Vrouwen ende heeft dit minlicken elckman vertelt, alzo dat van devocie ende compunctie mennich mensch weenden, doende en betalende die H.Maghet Maria zijn belofte ende bedevaert anno Lxj i festo ambit.beat. Virginis Mariae.
424
Item het was een vrouken van s'Hertogen bosch,welck had een dochter van xiiij iaeren, die haer een handt gecrompen was, alzo dat die vijngeren inder hant toegesloten lagen ende niet op en mochten. Ende overmits informacien goeder menschen, soe loeffde deze moeder voerseijt Onse L.Vrou te versuecken mit haer dochter. hopende gracie te verwerven. Ende is gecomen t'Amersfoert in Onser L.Vrouwen kerck, haer lofte voldoende. Ende in iegenwoerdicheijt Onser L.Vrouwen beeldt heeft zij geheel gesontheijt dier beslotene handt aen Maria verworden. Anno Lxij.
