MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
424
Item het was een vrouken van s'Hertogen bosch,welck had een dochter van xiiij iaeren, die haer een handt gecrompen was, alzo dat die vijngeren inder hant toegesloten lagen ende niet op en mochten. Ende overmits informacien goeder menschen, soe loeffde deze moeder voerseijt Onse L.Vrou te versuecken mit haer dochter. hopende gracie te verwerven. Ende is gecomen t'Amersfoert in Onser L.Vrouwen kerck, haer lofte voldoende. Ende in iegenwoerdicheijt Onser L.Vrouwen beeldt heeft zij geheel gesontheijt dier beslotene handt aen Maria verworden. Anno Lxij.
425
Item het was een vrou en had een kijndt van vijff iaeren geboren van Schuttrup, twelck in den dreck verdrencte, also dattet langer doot was dan anderhalff ure, alzo dat die moeder quam ende vant haer kijndt liggen als voorseijt is. In deser noot loeffde die moeder haer bevaert tot Onser L.Vrouwen t'Amersfoert. Ende terstont wert t'kijndt levendich.
426
Item het was een man van Noorthoren, ende had een dochterken van xv off xvj iaeren, die drie uren off daer boven int water gevallen lach, ende scheen altemael doot te wesen. Die vader mit zijn vrienden sijnt seer droewich geweest, soeckende zijn dochter ende heeftse gevonden als voorseijt is. Dus heeft die vader genade begeert aen Maria die Moeder Goedts. Ende heeft zijn bevaert geloeft tot Onse L.Vrou t'Amersfoert. Ende terstont is die maecht ontworpen ende is gesont geworden Anno Domini nostri Lxiij.
