MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
427
Item Anno Lxiij wasser een eerbaer vrou van Elst ende had een kijndt, dat seer geschoert was. Dese vrou heeft haer bevaert geloeft mit haer knechtgen t'Onser L.Vrouwen t'Amersfoert, ende terstont soe is dat kijndt gesont geworden. Corts hier nae soe is die eerweerdighe legaet des stoels van Romen neder in desen landen gecomen, wederradende den gemeenen volck enighe bedevaert hier in dese landen te doen. Hier om is dese voerseijde vrouwe te biecht gegaan, beradende haer mit haeren biechtvader, wes hem hier gets in docht gedaen. Opt welck hij haer geraden heeft, die bedevaert, die zij geloeft had, niet te doen. Corts hier nae soe is dat kijndt weder geschoert geworden, also dat dese vrou weder dese bevaert geloeft heeft mits haer kijndt, als zij eerst gedaen , weder gaende tot haren biechtvader ende hem geseijt, hoe dat kijndt weder gesont geworden waer; overmits Maria die weerde Moeder Goedts t'Amersfoert versocht woude wesen; also dat dese priester haer geraden heeft, dat zij die bedevaert doen soude, als zij geloeft hadde. Aldus is dese vrou gecomen mit haeren kijndt, gesont ende machtich ende heeft haer bevaeret gedaen, als zij eerst geloeft hadde.
428
Item anno Lxiij was een vroukwn vanden Aenstoet in Veluwen en had een jonck kijndt, welck zij vant leggen verdrenct in een tobbe mit water. Dit kijndt toech zij haestelick vuijt den tobbe ende heeft het langer dan een ure voor doot gehouden. In dese droeffenis soe heeft dit vrouken haer bevaert geloeft te versuecken dat weerde beeldt van Onser Lieve Vrouwen tot Amersfoert. Ende terstont soe is dat kijndt levende geworden
