MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
431
Item noch een ander man vuijt Maeslandt geboren, die hadde een zoen, die lange tijt miemerende geweest had, also dat hij sijnre sinnen onmachtig was. Dese vader van den soon voerseijt heeft zijn bevaert geloefft tot OnserL.Vrouwen tot Amersfoert ende te hant is zijn zoon gesont geworden.
432
Item het was een man geheeten Jan Holckhuijs van Munster geboren. Ende soude glas halen te Cassel inden landen van Hessen. Ende is int wederkeeren gecomen in die heerschappie vander Lip, wanderende door een bosch, dat gelegen was bij een slott, geheeten der Zwalcluijksteren gesloeten ende een ijser in die mont gebonden voert ropen ende alzo om den boenberch, van welck slot gecomen zijn vier gesellen ende hebben hem beroeft ende een buegel bij hem gehadt, die twe cluijsteren had, welcke buegel zij neder lieten om een boem, die boven gescherpt was, ende niet verre van den slot voerseijt int bosch stont. Oock mede soe hebben zij sijn handen mit twe crammen op een hout genagelt, ende zijn been mit die cluijsteren gesloeten ende een ijser in die mont gebonden voert roepen ende alzo om den boom gevangen gehouden IX weken. Daer dese man voerseijt dus swaerlick gevangen sat, is hij denckende geweest, hoe dat weerde beeldt van One L.Vrou t'Amersfoert grote ghenade ende teijken aen den bedructen, haer aenroepende, plach te doen ende heeft geloeft haer oetmoedelick te versuecken in dien hij vuijt dier last coemen mocht. Daer hij hier nzae dus lach en sliep snachts omtrint xij uren, soe docht hem, dat Maria tot hem quam ende sprack tot hem:"Waer nae legstu hier? Stant op en ganck wech". Also dat hij ontwaeckende daer off wert ende vandt zijn handen ontbonden ende een claer licht om hem schijnende. Ende daert die gesellen seer schoen plachten te houden omtrent den boem, daDr hij sat, van hout off van tacken van den boem om hem selven los te maecken, soe heeft hij om gesien ende heeft een sprocksken gevonden, daer hij dat een cluijster van zijn been mede los gemaeckt heeft ende heeft hem selven opgericht aen den boom, daer hij mit dat een been noch aen den boom gesloten was. Ende heeft hem selven bij hulp der Moeder Goedts mit den rijnck boven aen den boom geheven ende terstont hier nae is hij dat licht weder quijt geworden ende is gecroepen een stuckien weechs van den boem onder een struijck en daer die nacht alsoe voert bliven leggen. Des smorgens omtrent acht off negen uren hebben zij een jongen vanden slot geseijnt, die sien soude, hoe hetmet haer gevangen waer, ende hem eeten brengende. En heeft hem niet gevonden, also dat hij ten slot gelopen is ende heeft het geseijt, hoe den gevangen daer niet en waer. Dese vier voerseijde gesellen sijnt offgecomen mit honden ende wijnde ende hebben hem niet gevonden. Dese voerseijde honden ende wijnden ende hebben hem neerstelick gesocht, Die honden dicht bij hem coemende en hebben hem niet gevonden. Dese voerseijde gevangen is aldus gedwaelt vier daech lanck inden bosch. Ende op den vijffden dach is hij gecomen in d'stadt van Pilboren ende van daer is hij gecomen ende heeft den rijnck noch om sijn been gehadt. Ende heeft zijn bevaert gedaen.
