MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
438 Anno Lxiiij
Item het was een vroutgen van Naerden, die een kijntgen had, dat een halve nacht int water verdrenct gelegen had. Dat vroutgen voerseijt is smorgens vuijt gegaen, soeckende haer kijndt ende heeft het gevonden verdrenct. Zij loeffden haer bevaert voer dat beeldt Onser L. Vrouwen t'Amersfoert. Ende terstont is dat kijndt levendich geworden.
439 Anno Lxiiij
Item het was een man, die langer dan xx jaeren seer geschoert geweest had ende geen hulp aen tijtlicke meijsters vijnden en conde.Dese man is gedachtich geweest des beeldts van Onse L. Vrou
t'Amersfoert te versuecken ende cort hier nae, soe is hij gesont geworden sonder hulp van enich meijsters toe doen.
440 Anno Lxiiij
Item het was een moelenaer woenachtich te Haerlem, genoemt Aert Jansz., die had een dochter, welck stom was vijff iaer. Ende want hij is voerleden tijden Onse L. Vrouwen genaden t'Amersfoert versocht had. Des gedachtich loeffde hij devotelick zijn dochter Onser L. Vrouwen te praesenteren. Ende cort na der loften, soe is zijn dochter geworden spreeckende. Ende heeft zijn bevaert gedaen mit zijn dochter voerseijt in Onser L. Vrouwen vaert, anno praescripto
441 Anno LXV
Item het was een eerbaer priester, woenachtich te Bruessel ende ginck schieten mit sommige schutten ter deijl in die stadt voerseijt. Ende van een schut mit een vier achter dat oer heeft int hoeft geschoeten, also dat dat ijser van die vier int hoeft bleeff steecken. Ende droecht vijff maenden lanck. Welcke priester in grote cranckheijt viel. In welcker cranckheijt ende zieckten hij denckende wert op dat beeldt van Onse L. Vrouwen t'Amersfoert ende heeft daer zijn bedevaert geloeft ende des selven nachts is hij dat ijser bij die hulp van Onser Vrouwen onwetende quijt geworden.
