MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
452
Item een vrou te Purmereijne had een kijndt, dat IX daghen een spelde in hadde ende dat was alsoe zieck, dat zij meenden, dattet daer aen gestorven soude hebben. Ende doe zij hier haer bedevaert geloeft hadde mitten kijnde, quam die spelde hem weder te monde vuijt mit dat scherpe voer ende wert gesont.
453 Anno Lxxij
Item het was een knecht vander Goes, die had twe qaer op krucken gereden. Ende hij quam daer mede tot Onser L. Vrouwen ende dede zijn bevaert. Ende liet zijn krucken hier staen ende ghijnck gesont weder t'huijs.
454
Item het was een kijndt van bij Boelsweerde, dat liep in een rollewaghen ende liep int water, ende was verdrenct vier uren lanck. Ende d,ouders loeffden haer bevaert tot Onser L. Vrouwen , ende t'kijndt wert levende. Ende quamen mitten kijnde haer bevaert doen.
455
Item het was een man van Delft, die was becoemert off beseeten mit den boosen gheest. Ende hij loeffde hier zijn bedevaert ender wert gesont.
456
Item het was een man van Blenckvliet, ende had een klier aen sijn hals ende liet hem dat duersteecken ende die meijster stack hem in een ader, ende die bloeijde xij weecken lanck, dattet niemant gestempen en konde. Ende hij loeffde zijn bevaert tot Onser L. Vrouwen ende rechtevoert was het gestempt. Ende deze man voerseijt had een wijff, die had eenen swaren hoest, dat zij niet eeten en mochte een mont vol, zij begost te hoesten also seer, dat zij nergens geduren en konde. Ende soe loeffde hier haer bevaert. Ende alzo drae als zij dat gedaen had, wert zij gesont. Ende zij quamen tesamen hier en deden haer bevaert, wollen en bervoets.
