MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
456
Item het was een man van Blenckvliet, ende had een klier aen sijn hals ende liet hem dat duersteecken ende die meijster stack hem in een ader, ende die bloeijde xij weecken lanck, dattet niemant gestempen en konde. Ende hij loeffde zijn bevaert tot Onser L. Vrouwen ende rechtevoert was het gestempt. Ende deze man voerseijt had een wijff, die had eenen swaren hoest, dat zij niet eeten en mochte een mont vol, zij begost te hoesten also seer, dat zij nergens geduren en konde. Ende soe loeffde hier haer bevaert. Ende alzo drae als zij dat gedaen had, wert zij gesont. Ende zij quamen tesamen hier en deden haer bevaert, wollen en bervoets.
457
Item tot Utrecht op Gansoerde daer was een maisken ende viel int water ende was wel ij uren int water eerment gevinden conde. Ende doe zijt gevonden hadden, doe was wel vijff uren, datmen niet en wist, dant all doot was. Ende die ouders mitten buren loeffden hier haer bedevaert ende twert weder levende. Ende quamen hier te samen en deden haer bedevaert.
458 Anno LXXiij
Item het was een kijndt te Loeffs in een put gevallen. Die ouders sochten dat kijndt een halff ure lanck, eer zij dat vonden. Ende doe zijt gevonden hadden, loeffden zij hier haer bevaert ende t'kijndt wert weder levende.
459
Item het was een kijndt van Purmereijne, gevallen in een keyel mit weij ende verdrenct. Die ouders loeffden haer bevaert ende dat kijnt wert weder levende.
