MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
463
Item het was een vrou van Kuunredijck, die hadt een kijndt, dat hadt een zuuckt, dattet veel schreijden. Ende in dat schreijen soe wort soe swert. Ende die ouders die vermoeden, dat dat kijnt doot bliven soude. Zij loeffden haer bedevaert mitten kijnde all hier. Ende dat kijnt is weder geheel gebetert.
464 Anno LXXiiij
Item daer was een man van Meegen, die had een zuuckt, daer hij alzo cranck off was, dat niemant hem lijff en gaff. Enden ten lesten bleeff hij leggen van smorgens te seven uren tot middernacht toe, dat men niet en sach, dat daer enich leven in was. Ende zijn vrienden die daar bij waren, loeffden haer bevaert hier voer Onse L. Vrou. Ende te hant ontwerpt hij en beterde. Ende quam hier en dede zijn bedevaert.
465
Item daer waren twe kijnderen te Moerdrecht bij der Goude, en liepen en iaechden nae enden, alzo lange dat zij beijde int water vielen ende drenckten. Ende doe die ouders haer vonden, wisten zij niet, hoe lange zij doot geweest hadden. Ende die ouders loeffden haer bevaert hier voer Onse L. Vrou. Ende beijde die kijnderen worden weder levende. Ende zij quamen en deden haer bedevaert.
466
Item daer was een schipper vuijt Zeelandt tot Sint Jacob gezeijlt. Ende doe hij wederom varen soude, soe quam daer also grote sturm in die Spaensche zee, also dat zij van last ende noden quamen onder Engelandt aen een vlack landt, alzo dat zij anders niet en wisten, dan zij allen drencken souden. Ende die een loeffde zijn bevaer te Romen ende die ander S,Jacob, all en holp het niet. Ende ten lesten loeffde nd'schipper zijn bedevaert hier voer Onse L. Vrou tot Amersfoert. Ende rechtevoert wert het goet weder ende chregen goede wijnt ende quamen all gesont thuijs. Ende die schipper heeft hier zijn bevaert gedaen ende heeft geoffert een silveren hullick.
