MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
466
Item daer was een schipper vuijt Zeelandt tot Sint Jacob gezeijlt. Ende doe hij wederom varen soude, soe quam daer also grote sturm in die Spaensche zee, also dat zij van last ende noden quamen onder Engelandt aen een vlack landt, alzo dat zij anders niet en wisten, dan zij allen drencken souden. Ende die een loeffde zijn bevaer te Romen ende die ander S,Jacob, all en holp het niet. Ende ten lesten loeffde nd'schipper zijn bedevaert hier voer Onse L. Vrou tot Amersfoert. Ende rechtevoert wert het goet weder ende chregen goede wijnt ende quamen all gesont thuijs. Ende die schipper heeft hier zijn bevaert gedaen ende heeft geoffert een silveren hullick.
467
Item daer quam een kijndt vuijt die Velu, dat niet gaen en konde ende nije gegaen hadde. Ende die ouders hadden hier haer bedevaert geloeft. Ende het kijndt wert hier gaende.
468 Anno LXXV
Item hier quan een man van Haerlem ende had gevangen geseten op zijn lijff, also datmen hem gericht soude hebben. Ende hij quam oock mit boeijen ende veeteren daer hij in gesloten hadde geweest doe hij zijn bevaert had geloeft hier voer Onse L. Vrou te doen. Ende hij quam hier en dede zijn bevaert en seijde: Had Onse L. Vrou hem niet geholpen, het hadde onmoegelick geweest hem vrij vuijt te coemen.
469
Item daer quam een hullick gevaren in die Spaensche zee. Ende die hullick versonck in den gront. Ende daer waren xviij gesellen en quamen in een boeyt,ende dreven negen daghen sonder eeten off drincken. Ende zij loeffden hier haer bevaert te doen voer Onse L. Vrou. Ende zij quamen te lande ende hier heeft daer twe off geweest ende hebben haer bevaert gedaen.
