MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
469
Item daer quam een hullick gevaren in die Spaensche zee. Ende die hullick versonck in den gront. Ende daer waren xviij gesellen en quamen in een boeyt,ende dreven negen daghen sonder eeten off drincken. Ende zij loeffden hier haer bevaert te doen voer Onse L. Vrou. Ende zij quamen te lande ende hier heeft daer twe off geweest ende hebben haer bevaert gedaen.
470
Item hier quan een man vuijt Hollandt en seijde, dat hij quam mit een hullick zeijlen vuijt Engelandt onder die roevers. Ende zij hadden hem aen boert geleijt. Ende hij en wist anders niet, dan hij daer gebleven soude hebben. Ende hij wert denckende op Onse L. Vrou t'Amersfoert. Ende hij loeffde haer te versuecken. Ende rechtevoert soe schoet dat roeff schip van hem. Ende zij ontzeijlden hem, alzo dat zij vrij quamen sonder enich verlijs ofte schade.
471
Item hier quam een man vuijt Hollandt, ende seijde, dat hij in groter last was in die sturm voor Sinte Gall. Ende die schippers loeffden hier haer bevaert voer Onse L. Vrou ende zij worden verlost.
472
Item het was een maghet van xij iaeren off daer omtrent te Leewerden, die blijnt geweest had ij jaeren. Die ouders loeffden haer bevaert t'Onser L. Vrouwen tot Amersfoert. Ende cort daer nae ist siende geworden.
473
Item in een derp bij Dordrecht was een kijndt verdrenckt. Ende die ouders loeffden Onse L. Vrouwe te versuecken. Ende dat kijndt is weder levendich geworden. Ende zij hebben haer loften betaelt.
