MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
477
Item bij Amerongen quam een waghen vol volcxs varen op een breeden wech. Ende daer was een modderighe sloet bij. Ende die waghen is omgevallen ende dat volck is in die sloet gevallen. Item toe sijn zij weder vuijtgecomen ende hebben haer waghen toegemaeckt ende zijnt een stuk weechs van daer gevaren. Item toe hebben zij onder malcander gemist een knechtgen van xiiij iaeren. Ende dat was in die modder blieven steecken, soe dat ment niet gesien en konde. Ende soe zijn zij haestelick wederomme gelopen ende hebben dat kijndt gesocht. Ende zij hebbent in die sloet gevonden en hebbent doot vuijtgetoghen. Ende hebben haer bevaert mit dat kijndt geloeft t'Onser L. Vrouwen t'Amersfoert ende voer Onse L. Vrou laten te weghen ende terstont als zij haer bedevaert geloefft hadden, soe is dat kijndt levendich geworden. Anno Lxxxxiij.
478
Item op een Palmdach des avonts als men Ave Maria clopt, soe was daer een vrou ende woende bijder Gouwe. Ende was op haer knijen geseten ende solde haer Ave Marie lesen ende had haer kijndt bij haer sitten mit gevouwen handen, ende was van iiij iaeren. Ende dat kijndt is vuijten huijs gelopen ende is verdrenct in een sloet. Ende tijt daer nae,soe solde die moeder water halen ende heeft haer kijndt doot gevonden in die sloet. Zij heeft hem vuijtgetogen voor doot ende is doot gebleven een halff ure daer nae. Ende terstont loeffde zij haer bevaert tot Onse L. Vrou t'Amersfoert ende all soe drae, als zij haer bevaert geloeft had, soe ist levendich geworden. Anno Lxxxiiij.
479
Item te Campen was een maghet, ende had een speld versloenen in haer lijff. Ende zij heeftse iij daghen in haer lijff gehadt. Ende op den derden dach is zij seer wee geworden ende heeft die speld gevoelt beneden haer borsten. Ende dese voerseijde maghet is op haer knijen gevallen ende heeft haer bevaert geloeft tot Onse L. Vrou t'Amersfoert. nde soe gerijng als zij haer bevaert geloeft had, soe is zij spouwende geworden ende heeft die spelde overgegeven, die welck zij gebrocht heeft tot Onser L. Vrouwen, die men schouwen mach, ende daer mede geoffert een silvere speldt. Anno Lxxxiiij des Saterdaechs nae S.Servaesdach.
