MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
479
Item te Campen was een maghet, ende had een speld versloenen in haer lijff. Ende zij heeftse iij daghen in haer lijff gehadt. Ende op den derden dach is zij seer wee geworden ende heeft die speld gevoelt beneden haer borsten. Ende dese voerseijde maghet is op haer knijen gevallen ende heeft haer bevaert geloeft tot Onse L. Vrou t'Amersfoert. nde soe gerijng als zij haer bevaert geloeft had, soe is zij spouwende geworden ende heeft die spelde overgegeven, die welck zij gebrocht heeft tot Onser L. Vrouwen, die men schouwen mach, ende daer mede geoffert een silvere speldt. Anno Lxxxiiij des Saterdaechs nae S.Servaesdach.
480
Item 's Maenendaechs voer S. Maria Magdalena, soe quam een vroutgen wonende t'Sevenhuijsen bij Amersfoert ende soude om water gaen, ende vijndt haer kijndt, dat binnen twe iaeren was, verdrenct leggen voor doot in een sloet, ende zij en wiste niet hoe lange dattet daer inne geweest had. Ende zij loeffde haer bevaert mit dat kijndt voer Onse L. Vrou. Ende terstiont is dat kijnt ontworpen.kintontworpen. Anno Lxxxv.
481
Item bijder Gouwe was een clerck, die van den geenen, daer hij mede gijnck, vermoedelick, tussen een derp geheeten Stolwijck ende die stadt vander Gouwe, van achteren in sijn hals geslagen wert, alsoe dat hij verloren heeft dat dardendeel binnen van zijn hals, want die grote zene in die nack ende die grote zene, die daer streckt inden hals, gesneden waren vuijt, welcke slagijn bloedijnghe hij heel in onmacht geworden is. Waerom hij aengeroepen heeft Mariam die Moeder Goedts om sterckheijt ende bijstant. Ende heeft geloeft ter eeren van haer, waert saeck dat hij levendich ter Gouwe mochte coemen ende heelen, dat hij haer t'Amersfoert soude versuecken. Ende aldus is hij opgestaen ende doer verdiensten Mariae en haer lieve Zoon volcoemelick geheelt.
