MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
484
Item daer was een man van Leijen, ende was vuijter maeten seer geschoert ende leedt alte grote pijn iij jaeren lanck ende sonderlijnghe alt onweren wolde. Dese man heeft zijn bevaert geloeft tot Onse L. Vrou t'Amersfoert. Ende gij is terstont gesont geworden. Anno Lxxxv.
485
Item dat waren iiij gesellen vuijt Hollandt, die waren gevangen in Vranckrijck en hebben Onse L. Vrou aengeroepen mit devotien. God ende zijn lieve Moeder heeft hem ontfermt ende hebben haer die gracie gegeven, dat zij een ijsere bout ende plancken die drie vijnger dick waren met een plomp mes doorgesneden hebben. Geloeft moet die gebenedide Moeder wesen dusent vout. Item zij saten drie iaeren min acht daghen. Ende dat geschiede op Onse L. Vrouwen navitatis dach. Anno Lxxxv.
486
Item bij Alckmaer was een maecht, die viel vuijt een schuijt mit hoeij int water, Ende die bij haer in die schuijt waren, die sochten wel een ure lanck ende kindense niet vijnden. Ende haer moeder wert denckende op die genade Onser L. Vrouwen t'Amersfoert ende loeffde haer mitten dochter te versuecken. Ende doe zij dat geloeft had doe vonden zijse ende toghen haar doot op. Ende zij lietense mit die voeten int water leggen om vrese van den heere vanden lande. Ende zij had haer tonghe tusschen haer tanden, alzo vast, datmen mit gewelt die mond op most breecken. Ende wort terstond mede levendich, Ende zij quamen in die vaert van Onse L. Vrou en deden haer bevaert int jaer Lxxxvij.
