MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
487
Item het was een man vuijt Vrieslandt die stom wert in de Meije. Ende hij loeffde zijn bevaert tot Onse L. Vrou tot Amersfoert ende hij quam in die vaert daer na en dede zijn bevaert voer Onse L. Vrou ende daer wert hij weder volcoemelick spreeckende. Anno Lxxxvij.
488
Item te Oudekercken bijder Goude was een vrou, die ghijnck op eenre tijt doer haer huijs gesont ende machtich. Ende daer quamt haer haestelick mit eenre weente, dat haer die beenen ende voeten begonsten te swellen, also dich als potten, datmen daer iamer aen haer sach. Ende daer sat soe viij daghen lanck, dat zij gaen off staen ende konde. Ende daer zijnt die buren gecomen om haer te vanden. Ende hebben haer geraden, dat zij haer bevaert loven soude tot Onse L. Vrou t'Amersfoert. Ende daer loeffde zij terstont Onse L. Vrouwe te versuecken ende terstont vernam zij beterijng ende wert gesont. Ende is gecomen des Dijnsdachs nae H. Sacraments dach. Ende heeft haer bevaert gedaen. Anno Lxxxvij.
489
Item te Delft was een kijndt van dardalff iaer ende had groet gebreck vanden steen, also dattet lach viij daghen lanck, datmen meenden, dat het sterven soude. Die moeder wert denckende op die ghenade Onser L. Vrouwen t'Amersfoert ende heeft haer bedevaert geloeft ende dat kijnt laten te weghen mit wijn ende weijt, mit gout ende silver. Ende terstont is hem die steen offgegaen doer zijn manlickheijt. Ende zij is gecomen mitten kijnde ende heeft haer belofte voldaen Swoendachs nae H. Sacranentsdach anni Lxxxvij.
