MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
491
Item het was een man van Amsterdam, die gevangen sat te Diepen in Vranckrijck in een huijs op een hoghe solre in swaren vanghenisse ende mit swaren ijseren banden gesloten. In die swaren last wesende, loeffde hij Onse L. Vrouwe te versuecken mit een wassen man als hij gesloten was, om troest te verchriegen. Ende doe overmits hulpe Onser L. Vrou snee hij mit een cleijn mesken een vijnger lang die banden ontwee ende reet mit een slaeplaecken vuijt den veijnster ende quam in een ander huijs all omme vast toegemaeckt. Ende daer lange tijt oock in wesende ende daer nae vuijtquam overmits t'mirakel is oock over die stadtsmuer gereden ende op den dach coemende, wert hij gesocht van zijn vijanden, die hij wel sach ende zij saghen hem niet, want hij achter een doerne bosken lach. Ende aldus quijt coemende is hier gecomen ende heeft zijn bevaert gedaen anno Lxxxvij.
492
Item het was een man in die Dirckt bij Amersfoert ende vuerde zijn coorn in den berch, ende sach zijn kijnderen lopen spielen, onder welcke hij een kijndt miste van ij jaeren. Ende zij sochten dat kijndt= ende vondent in een put mit water ende zij en saghen daer niet off, dan zijn een handt boven het water legghen ende hij toech dat kijndt vuijt, ende liet het mit zijn voeten hangen over die put om anxt vanden Heere vande lande, want dat kijndt doot was ende verdrenct, Ende want hij daer geen leven in en sach, soe heeft hij zijn bevaert geloeft tot Onse L. Vrou t'Amersfoert mitten kijnde ende mit zijn offerhande. Ende terstont wer dat kijndt levendich. Ende hij is gecomen ende heeft zijn bevaert gedaen des Dijnsdaechs nae Onser L. Vrouwen navitatis dach.
493
Item int landt van Berghe bij Emmerick in een derp geheeten Dijem was een maghet seer swaerlick beseten mitten Duvel, soe datmense most slueten in ijsere boeijen, handen ende voeten. Ende dat heeft omtrent een vierdel iaers geduert. Aldus beseten wesende is zij denckende geworden op Onse L. Vrou t'Amersfoert ende heeft daer haer bedevaert geloeft om Onse L. Vrouwen beeld daer te versuecken. Ende also vroech als zij haer bevaert geloeft had, soe is zij voert mede verlosset vanden Duvel. Ende dese maghet is gecomen tot Amersfoert ende heeft haer bevaert gedaen ende heeft haer boeijen hier gelaten op Sint Simon ende Judas dach. Anno domini nostri M.cccc Lxxxvij.
