MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
493
Item int landt van Berghe bij Emmerick in een derp geheeten Dijem was een maghet seer swaerlick beseten mitten Duvel, soe datmense most slueten in ijsere boeijen, handen ende voeten. Ende dat heeft omtrent een vierdel iaers geduert. Aldus beseten wesende is zij denckende geworden op Onse L. Vrou t'Amersfoert ende heeft daer haer bedevaert geloeft om Onse L. Vrouwen beeld daer te versuecken. Ende also vroech als zij haer bevaert geloeft had, soe is zij voert mede verlosset vanden Duvel. Ende dese maghet is gecomen tot Amersfoert ende heeft haer bevaert gedaen ende heeft haer boeijen hier gelaten op Sint Simon ende Judas dach. Anno domini nostri M.cccc Lxxxvij.
494
Item yoy Rotterdam was een knechtgen van anderhalff iaer, ende had op geslonden een halve stuver ende lach daer aen in grotercranckheijt,croenende daer aen voer zijn hart, dat daer een ieder groot iamer aen sach, ende geen raedt en wisten den penninck vuijt te criegen.Soe wert die moeder denckende op die mirakelen van Onse L. Vrou tot Amersfoert ende loeffde haer bevaert daer te versoecken mit den kijnde. Ende terstont is dat kijndt gesont geworden ende men weet niet waer den penninck is gebleven. Ende is mitten kijnde gecomen ende heeft haer bevaert gedaen op S. Jans avont middesoemer Anno Lxxxiij.
495
Item aen gheen zijde Mens was een man gesteecken in zijn selffs huijs, als boven in zijn scholderen tot beneden zijn gemacht weder vuijt. Ende lach voor doot ses uren lanck, ende als men hem int vat leggen soude, doe wert die ander man, die daer op den kerckhoff was om vreese zijns lijffs, denckende op die mirakelen ende barmharticheijt, die God doer Onse L. Vrou t'Amersfoert dede en loeffde Onse L. Vrouwe te versuecken. Ende terstont doe hij dat loeffde, wert hij weder levendich ende seer bloeijende. Ende zijn huisfrou is gecomen en heeft die bevaert gedaen, also alst haer man geloeft had, want hij selfs doer dat landt niet wel en trecken dorst. Ende zij is gecomen en heeft die bevaert gedaen op S. Peter en S.Pouwels dach Anno Lxxxix.
