MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
497
Item op Onse L. Vrouwen dach midden oost geschieden dat een oosterschip quam zeijlen vuijt Zeelant onder Engerlandt. Ende overmits onweerder ende tempeest quamen zij zeijlen op Kreijenbanck ende dat schip begost daer te kraecken ende te schueren, alzo dat zij waren in groter anxt haers llijffs, want zij geen troest en saghen, die doot te ontgaen. Ende daer bevalen zij God ende zijn lieve heijlighen zijell ende lijff. Ende daer waren in dat schip omtrent vijftich personen, onder welcken een van Deventer genoemt Jan van Essen. Die seijde, dat zij aenroepen souden Onse L. t’Amersfoert, die welck inden water gevonden was ende grote mirakelen doot ont water, op dat zij ons bijstaen wil. Ende doe ruiepen zij gemeenlick Onse L. Vrou aen om verlost te worden. Ende die zij terstont geen troest en vernamen, toe seijde een onder hem: “wij moeten een trouwe pilgrom vuijtmaecken, die haer versoecktet voer ons allen mit een trouwe offerhande. Ende daer loeffden zij mit malcander Onse L. Vrou een silver schip te geven. Ende terstont doe zij dat geloeft hadden, heffede hem dat schip op sonder enighe sonderlijnge wijnde een grote cubijt te rugge in dat diepte ende zij zijnt gesont te lande gecomen. Ende Jan van Essen heeft die offerhande ende dat silveren schip voor Onse l. Vrou gebrocht anno Domini MCCCCXC.
498
Item t’Utrecht was een kijndt noch binnen zijn iaer ende stont aen een sitten ende viel te ruggen op zijn hoeft ende lach daer lange voor doot, want zij daer geen leven in en saghen. Ende daer geschiede, was int huijs een geestelick persoone van Amersfoert. Ende die sijde, want hem die ouders qualicken hielden, dat zij haer bevaert loven souden voer Onse L. Vrou t’Amersfoert. Ende terstont, sonder eens dat huijs over te gaen, begost hem dat kijndt te roeren. Ende die ouders sijnt mit den kijnde gecomen en hebben haer bevaert gedaen Anno Domini Mcccc xc.
