MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
498
Item t’Utrecht was een kijndt noch binnen zijn iaer ende stont aen een sitten ende viel te ruggen op zijn hoeft ende lach daer lange voor doot, want zij daer geen leven in en saghen. Ende daer geschiede, was int huijs een geestelick persoone van Amersfoert. Ende die sijde, want hem die ouders qualicken hielden, dat zij haer bevaert loven souden voer Onse L. Vrou t’Amersfoert. Ende terstont, sonder eens dat huijs over te gaen, begost hem dat kijndt te roeren. Ende die ouders sijnt mit den kijnde gecomen en hebben haer bevaert gedaen Anno Domini Mcccc xc.
499
Item te Antwerpen was een wijff zieck aen die pestellencie en had negen open gaten, onder welck een gat was in haer ziede, also groot, datmen daer wel twe vuesten ingesteecken souden hebben. Welck gat wert mit een vaemme toegenaeijht. Ende zij in grote last wesende, soe heeft zij mit radet haers biechtvaders haer bedevaert geloeft, want zij grote anxt hadde te sterven, omdat zij geen troest en sach te leven. Aldus soe heeft zij dat Onse L. Vrou toegeschreven ende bij mirakel van haer gesont geworden. Ende zij heeft haer bevaert gedaen Anno Domini Mcccc xc.
500
Item te Emmerick was een meisken van ij iaeren gevallen in een calck cuijp. Die vader heeft daer zijn kijndt vuijtgetoghen voer doot ende brochtet die moeder op die schoert. Ende daer was groot iamer, dat haer kijndt soe verdrietelicken doot gebleven was ende versumet. Die buren, troestende die ouders, seijden, dat zij haer bevaert loven souden Onse L.Vrou tot Amersfoert, het soude wel gesont werden. Ende zij loeffden haer bevaert t'Amersfoert Onse L.Vrou ende terstont ontspranck dat kijndt, maer het bleeff noch iij daghen blijnt. Ende op den vierden dach werdet weder siende. Ende dat geschiede des Saterdachs voer hemelvaerts dach Anno Mcccc xc. Ende zij quamen en deden haer bevaert in die vaert.
