MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
500
Item te Emmerick was een meisken van ij iaeren gevallen in een calck cuijp. Die vader heeft daer zijn kijndt vuijtgetoghen voer doot ende brochtet die moeder op die schoert. Ende daer was groot iamer, dat haer kijndt soe verdrietelicken doot gebleven was ende versumet. Die buren, troestende die ouders, seijden, dat zij haer bevaert loven souden Onse L.Vrou tot Amersfoert, het soude wel gesont werden. Ende zij loeffden haer bevaert t'Amersfoert Onse L.Vrou ende terstont ontspranck dat kijndt, maer het bleeff noch iij daghen blijnt. Ende op den vierden dach werdet weder siende. Ende dat geschiede des Saterdachs voer hemelvaerts dach Anno Mcccc xc. Ende zij quamen en deden haer bevaert in die vaert.
501
Item t'Apcouwe was een knechtgen binnen zijn ij jaeren gevallen in een grave omgaende een boemghaerde ende doe het daer vuijtgetoghen was, doe lacht noch een ure daer nae voor doot ende all swart. Ende men wist oock niet hoe lange dattet daer inne gelegen had ende want zij daer geen leven aen en saghen noch troest Zoe vielen zij aen God ende zijn lieve Moeder. Ende hebben haer bedevaert geloeft t'Amersfoert voer Onse L.Vrou, daer dat kijndt te weghen mit wijn ende mit weijt. En terstont zo is dat kijndt ontspronghen ende gesont geworden. Ende zij hebben haer bedevaert gedaen des Dijnsdachs voor Maria Magdalena dach. Anno Mcccc xc.
502
Item te Heijnscoten was een man, die soude zijn schaep scheeren ende zijn wijff lach in die craem ende had noch geen drie weecken gelegen. Ende doe die schapen geschoren waren, ghijngen zij sitten eeten ende drincken. Ende doe isser een onweetende gaen sitten op dat kijndt, daert in die weghe lach ende heeft dat kijndt die een ziede van zijn hoeft all plat geseten, dattet kijndt aldus versuemt was, doe hielden zij hem qualicken ende loeffden dat kijndt te weeghen mit wijn ende mit weijt voer Onse L.Vrou t'Amersfoert. Ende terstont ontspranck dat kijndt ende wert weder levendich ende gesont. Anno Domini Mxxxx xcj.
