MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
503
Item een knecht van Oosterbeeck int lant van Gelre, was beroert in beijde zijn beenen, also dat hij niet gaen en koste dan op krucken. Mer ten lesten also seer beroert wert, dat hij op krucken oock niet gaen en cost. Maer men most maecken een wagentgen, daer men hem op voert toecht van straat die straet, soude hij die kost chriegen, want hij hem selven niet behelpen en corst. Ende die hem aldus mosten voert trecken, die loeffden haer bevaert aen God ende Onse L.Vrou t'Amersfoert. Ende zij hebben hem aldus voert getoghen van Amsterdam t'Amersfoert voer Onse L.Vrou. Ende daer wesende is hij slaepende geworden. Ende ten lesten steeten zij hem aen ende vraechden hem off hij enighe troest vernam. Ende hij seijde:"Mijn dunckt dat ick mijn beenen beginne te voelen." Ende zij buerden hem op. Ende all struemelende ghijnck hij voer den outaer ende dede zijn behoerlicke offerhande. Ende zij leijden hem drie werff om dat kerckhoff ende alleijnskens beter gaende geworden, heeft God ende Onse L.Vrouwe gedanckt ende heeft hier zijn waghen laten staen in kennisse der waerheijt. Ende dit is geschiet s'Woensdachs voer S.Jan middesoemer Anno Domini Mcccc xcj.
504
Item te Wijringen in West Vrieslandt, was een knechtgen van anderhalff iaer verdrenct ende lach doot langer dan drie uren. Ende zij riepen God aen en loeffden haer bevaert voer Onse L.Vrou t'Amersfoert. Ende dat kijndt is weder levendich geworden. Ende zij hebben mitten kijnde haer bevaert gedaen Vriedaechs voer S.Jacob, Anno Mcccc xcj.
505
Item te Nijebroeck inden lande van Gelre bij Deventer, daer ghijnck een vrou op S.Lourens dach in haer hoff ende haer volchde nae haer kijndt out wesende vijff vierdel iaers, ende viel onder weghen int water, daer zij niet en off wist. Ende doe zij weder thuijs quam, vondt zij het niet. Ende zij liep en sochtet ende ten lesten sach zij haer kijndt coemen drieven int water op zijn buijck. Zij viel inden water ende toech het kijndt doot vuijt den water. Ende doe zij haer kijndt aldus doot sach, doe riep zij God aen ende loeffde Onse L.Vrou t'Amersfoert te versuecken, wollen en bervoets. Ende een halff ure daer nae wort dat kijndt weder levendich. Om lieften en danckbaerheijt is zij gecomen op die octaeff van S.Lourens ende heeft haer bevaert gedaen Anno Domini Mcccc xcj.
