MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
506
Item ter Goes in Zeelandt ghijnck een knechtgen spielen ende droech een iong kijndt op zijn armen, ende sloech over ende viel op zijn hoeft op een efterijnghe deel ende lach daer lange voor doot. Ende doe dit die vader vernam, hiel hij hem heel qualicken ende die buren quamen lopen ende kermen, dat dat kijnt alsoe versuemt was. Doe quam daer oock een metselaer vuijt Hollandt. Die seijde dat die vader, dat hij zijn bevaert loven soude t'Amersfoert voer Onse L.Vrou, dat kijndt soude wel sonder twijfel levendich worden. Ende terstont doe hij zijn bedevaert geloeft hadde, wert dat kijndt weder levendich ende die vader loeffde gheen vleis te eeten, hij hadde zijn bevaert gedaen. Ende hij quam op den xvij Meij en dede zijn bewdevaert Anno Domini nostri Mcccc xcij.
507
Item een vrouken van Beverwijck was bedeten van den duvel ende wert gebrocht voer Onse L.Vrou om gratie te verchriegen. Ende des nachtes wesende in die kercke mit die gemeen pilgroms, wort zij luijt crijtende ende roepende. Ende daer toech die Duvel mede vuijt ende bedreeff alsuck gebeer in die kerck, dat die luden also seer verveert waren, dat zij creeten ende liepen ende op malcander spronghen en op den outaer van grote verveernisse. Ende daer was also grote stanck in die kerck alle die nacht, dat daer niemant wel geduren mocht. Ende dit geschieden Anno Domini nostri Mcccc xcij.
508
Item oock op den selven jaer; vaert; ende nacht; was daer een vrouken van Campen beseten vanden Duvel, ende seijde, dat zij oock op die zelfde tijt verlost wort, want vuijt haer mont ghijnck een dinck off het een rot geweest had, als haer docht.
