MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
511
Item het was een vrou van Utrecht, ende had een lamme narm. ende hadse soe gedragen vijff iaer lanck ende was also lamme ende doeff, dat zijse niet en voelden, alsmen daer mit een spelde in stack ende daer en liep oock geen bloeit vuijt. Aldus wesende in ellende, loeffde zij Onse L.Vrou t'Amersfoert te versuecken mit een wasschen arm ende zij is in die stadt van Amersfoert voer Onse L.Vrou gesont geworden op S.Victoris avont anno Domini nostri Jesu Christi Mcccc xcij.
512
Item het was een man van bij Coln, ende was gevangen te Diepen in Vranckrijck ende was geset in een kamer ende een iongen te bewaren gedaen. Ende mit cloeckheijt quam hij vuijt zijn handen ende in een minrebroeders cloester ende des savonts te poorten vuijt. Ende doe most hij noch over een water, dat soe wiet was, alsmen twe reijsen mit een armborst scheten mach. Ende hij daer geen troest toe en sach, zoeloeffde hij zijn bevaert tot Onse L.Vrou t'Amersfoert ende doe chreech hij een hout, soe dick als ruijm een arm. Ende daer mede op troest van Onse L./Vrouwe swemde hij over. Ende hij is gecomen ende heeft dat hout mede gebracht ende heeft zijn bevaert gedaen op S.Luciae avont. Anno Domini Mcccc xcij.
513
Item het was een meisken van Emenese out ij iaeren, ende was gevallen in een sloet. Ende die vader quam daer onversiens en sach zijn kijndt daer leggen ende toech het voer doot vuijt. Ende doe hij sach dattet doot was, doe liet hijt leggen mit die voet int water om des heeren boeten wille ende liep te huijs ende hiel hem seer qualicken ende besprack zijn wijff, dat zij dat kijndt soe bewaert had. Ende zij liepewn totten kijnde ende loeffden haer bevaert tot Onse L.Vrou t'Amersfoert. Ende zij hielden dat kijndt mitten hoefde nederwaerts, op dat hem dat water vuijt den hoeffde loopen soude. Ende mit een crijssinghe wert het weder levendich. Ende dit geschiede Donredach nae Onse L.Vrouwen lichtmis Anno mcccc xciij.
