MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
513
Item het was een meisken van Emenese out ij iaeren, ende was gevallen in een sloet. Ende die vader quam daer onversiens en sach zijn kijndt daer leggen ende toech het voer doot vuijt. Ende doe hij sach dattet doot was, doe liet hijt leggen mit die voet int water om des heeren boeten wille ende liep te huijs ende hiel hem seer qualicken ende besprack zijn wijff, dat zij dat kijndt soe bewaert had. Ende zij liepewn totten kijnde ende loeffden haer bevaert tot Onse L.Vrou t'Amersfoert. Ende zij hielden dat kijndt mitten hoefde nederwaerts, op dat hem dat water vuijt den hoeffde loopen soude. Ende mit een crijssinghe wert het weder levendich. Ende dit geschiede Donredach nae Onse L.Vrouwen lichtmis Anno mcccc xciij.
514
Item het was een knechtgen van Scherpenzeel van twe iaeren, ende was verdrenct in een sloet. Ende nae dat zij dat daer vuijt toghen, lach het noch wel iij uren voor doot. Ende die ouders hielden hem seer qualicken. Ende loeffden haer bevaert God ende Onse L.Vrou t'Amersfoert ende daer laten te weghen mit wijn ende mit weijt. Ende dat kijndt is weder levendich geworden. Ende zij hebben haer bevaert gedaen. Ende dit geschiede daechs voor Valecijns avont. Anno Domini Mcccc xciij.
515
Item Meijster Lodewijck Jager was te Schoenhoven gevangen ende wert inden Haghe gevuert, ende in sware gevanckenisse geleijt, alsoe dat hij well hondert pont ijsers aen handen ende voeten had. Ende in dese sware gevanckenis wesende, loefde hij God ende Onse L.Vrou t'Amersfoert zijn bevaert ende een beelde te offeren van een halff pont silvers. Also vroech als hij dat geloeft had, soe wert hij ontslaep ende doe docht hem, dat Onse L.Vrou tot hem quam ende het wert alzo licht in die kelre,daer hij sat, dat hij daer off ontwaecte ende doe viel hem dat ijser van handen ende voeten ende stont vrij op zijn voeten. Ende toe tasten hij aen die duere, die van buijten gesloten was mit ij slooten ende die ghijnck tegen hem op. Doe most hij noch gaen door die koecken ende daer saten twe maechden en sliepen ende in die zael saten veel heeren en aten. Daer ghijnck hij verbij, dat hem niemant en sach mit hulp van Onse L.Vrouwe.
