MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
522
Item het was een vrouken te Haerlem ende was beseten van die viandt. Ende die vrienden hebben haer gebrocht voor Onse L.Vrouwe in die vaert en daer heeftse groot gebeer en geruchte gemaeckt, dat die gemeen pilgrommen groot iamer aen haer saghen. Ende zij is gevallen in onmacht ende daer inne verlost ende gesont opgestaen. Anno Mcccc xcv.
523
Item het was een vrouken ende was beseten. Ende men hebt haergebrocht voer Onse L.Vrou t'Amersfoert ende in die grote gebare daer coemende, is zij verlost in die vaert Anno Mcccc xcv.
524
Item te Oudewater was een kijndt verdrenct van drie iaeren ende lach daer voor doot.Ende die ouders wesende in grote rouwe, soe hebben zij gevallen aen God ende zijn L.Moeder, want zij anders geen troest en wisten, soe hebben zij haer bevaert geloeft voer Onse L.Vrouwen beeldt tot Amersfoert ende terstont ist le endich geworden. Anno Mccccxcvij.
525
Item het was een knechtgen te Boezecum, dat zijn ooghen vuijt waren gegaen van die pocken. Ende op een tijt, te weten vijfftien iaeren hier nae, soe is hem in die sinne gebrocht, dat hij soude loven Onse L.Vrouwen beeldt te versuecken t'Amersfoert. Ende hij heeft zijn bevaert geloeft ende is siende geworden ende is gecomen ende heeft zijn bevaert gedaen op Onse L.Vrou octave visitationis dach Anno Mcccc xcvij.
526
Item het was een man t'Amsterdam ende was well out Lxxx iaeren ende deze man had een gat in zijn been, dat hij wel XL iaeren daer inne gehadt hadde. Ende hij hadde daer veel meijsters mede versocht, maer gheen meijsters konden hem dat gat toe heelen. Soe is gevallen, dat dit been is beginnen te swellen ende is also dick ende zeer geworden, dat deze man op dat been niet gaen en koste. Ende hij heeft aengeroepen God almachtich ende Onse L.Vrouwe t'Amersfoert. Ende dat been is gesloncken ende dat gat heel geworden in iij daghen. Ende hij is gecomen en heeft zijn bevaert gedaen den anderen dach nae S.Jacob. Anno Domini Mcccc xcvij.
