MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
531
Item het was een man ter Goude in Hollandt ende had een kijndt dat dardalff iaer out was. Ende is gevallen in een water schoeit mit zijn hooft in die gront, de modderich was. Ende een lange wijel daer nae, soe is daer een vrou gecomen om haer clederen vuijt te wasschen ende als die vrouwe gedaen had, soe sach zij op dat water drieven, off daer een out cleet opgedreven had. Zij heeft genomen een stock ende woude dat cleet aen landt halen ende doe zij dat aen landt gechregen hadde, soe sach zij, dattet een kijndt was ende zij en wist niet, hoe lange dattet daer inne gelegen hadde. Soe heeft zij daer meer luden bij gehaelt, die dit gesien hebben mit die ouders. Ende zij hebben aengerroepen God ende Onse L. Vrouwe ende hebben geloeft Onse L. Vrouwe t’Amersfoort te versuecken. En dat kijndt is wederomme levende geworden.
532
Item te Boemmel lach gevangen een man op zijn lijff ende was een Rhuijtergesel ende was gesloten aen elcke been mit een cluijster, gelijck als daer men die peerden mede placht te sluten. Dese man en wiste anders niet, dan dat men hem van daghe te daghe dooden soude. Dese man alzo sittende, soe hij seer bedroeft ende hij is denckende geworden op die grote ghenade die Godt daechgelicxs is doende t’Amersfoert doer Onse L. Vrouwen beeldt. Ende soe heeft hij geloeft Onse L. Vrouwen beelde t’Amersfoert te versuecken. Ende als hij dit geloeft hadde, soe heeft hij zijn betrouwen gehadt in Onse L. Vrouwe ende heeft genomen een stroij halm ende heeft daer mede in die cluijster gesteecken ende die cluijster is op gegeaen ende van zijn been gevallen. Ende daer nae heeft hij in d’ ander gesteecken ende is oock open gegaen ende van zijn been gevallen. Ende mit blijder harten soe heeft hij gedancket God ende Onse L. Vrouwe ende heeft die cluijsteren op zijn scholderen gehangen ende is daer blijdelicken gecomen te Buren, daer na is hij gecomen tot Amersfoert ende heeft zijn cluijsteren daer geoffert voor Onse L. Vrouwen beeldt Anno Mccccc.
533
Item het was een schipman, die quam zeijlen mit zijn schip onder Engelandt. Ende daer is opgestaan een onweeder ende sturme, soe dat zij dat zeijl niet striecken en konden ende achter vuijt dat schip is geborsten een groot hout, also dat zij waren in grote anxt haers lijffs, soe dat zij die doot voor haer oghen saghen ende hadden geenen troest die doot te ontgaen, soe is die schipper denckende geworden op die grote genade die daer daechgelicxs geschiet t’Amersfoert door bede van Onser L. Vrouwen. Ende hij heeft aengroepen God ende Onse L. Vrou ende heeft geloeft te versuecken Onse L. Vrouwen beeldt t’Amersfoert mit een keersse van vijff pont wasch. Ende terstont soe is die wijnt gaen leggen ende dat onweder is vergaan ende zij sijnt dat schippe gesont aent landt gecomen. Endie die schipper is gecomen t’Amersfoert en heeft zijn bevaert gedaen en heeft zijn offerhande gebrocht voor Onse L. Vrou, als hij geloeft hadde, op den viij dach in die Meij Anno M.D.iiij.
