MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
535
Het was een maghet van xij jaeren ter Goude in Hollandt, die beseten was mitten viandt. Doe d’ouders vant voerseijde madeken beloeft hebben Onse L. Vrou te versuecken binnen Amersfoert en t’kijndt voerseijt te weghen mit weijt, mit wijn ende waasch. Ende terstont hier nae soe ist kijndt verlost door die gratie Goedts ende Onser L. Vrouwen; geschiet int jaer ons heeren XVe xLiiij.
536
Het was een kijndt in die Loesdrecht dat verdrenckt was int water, daer die ouders niet en wisten off te verclaren, hoe lang dattet voerseijde kijndt gedrenckt geweest hadde. Dan worden alleenlick denckende op die gratie Goedts en hebben zijn gebenedide Moeder geloeft te versuecken binnen Amersfoert ende het kijndt laten ter weghen. Ende het kijndt is van stonden aen nae voerseijde beloften levendich geworden. Actum ut supra XVe xLiiij.
537
Het is geschiet tot Westerhoud, datter een man is geweest mit zijn kijndt op een waghen ende int varen is die voerseijde waghen omgevallen ende gestolpt in een water ende nae dat die man langer als een ure aen zijn middel int water gesiocht hadde nae het kijndt ende niet en vonde, is hij om hulp gegaen om die waghen vuijt te chriegen. Ende hebben alsulcx t’kijndt voerseijt gevonden in die gront ende het kijndt was doot, stijff ende kout, doen zijt boven water haelden ende bleeff noch ij uren daer nae doot. Soe hebben zij gedocht op die gratie Goedts ende beeldt van Onser L. Vrouwen t’Amersfoert ende beloeffden dat kijnt daer te brengen en laten te weghen haer offerhande betalen.Ende van stonden aen, nae die voerseijde beloften, heeft dat kijndt drie snickkens gegeven ende een halff ure daer nae ist voerseijde kijndt gesont ende machtich geworden. Actum Anno XVe Liiij.
