MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
537
Het is geschiet tot Westerhoud, datter een man is geweest mit zijn kijndt op een waghen ende int varen is die voerseijde waghen omgevallen ende gestolpt in een water ende nae dat die man langer als een ure aen zijn middel int water gesiocht hadde nae het kijndt ende niet en vonde, is hij om hulp gegaen om die waghen vuijt te chriegen. Ende hebben alsulcx t’kijndt voerseijt gevonden in die gront ende het kijndt was doot, stijff ende kout, doen zijt boven water haelden ende bleeff noch ij uren daer nae doot. Soe hebben zij gedocht op die gratie Goedts ende beeldt van Onser L. Vrouwen t’Amersfoert ende beloeffden dat kijnt daer te brengen en laten te weghen haer offerhande betalen.Ende van stonden aen, nae die voerseijde beloften, heeft dat kijndt drie snickkens gegeven ende een halff ure daer nae ist voerseijde kijndt gesont ende machtich geworden. Actum Anno XVe Liiij.
538
Item het was een vrouwe van Utrecht ende was blijnt geworden viij weken lange ende zij wort denckende op die gratie Goedts. Ende loeffden dat beeldt van Onse L. Vrouwe t’Amersfoert te versuecken, wollen en bervoets. Ende van stonden aen is zij siende geworden ende heeft Onse L. Vrouwe gedanckt Anno XVe xLiiij.
539
Item daer was een knechtgen van Delft, dat gebroecken was vijff iaer lanck ende die ouders geen troost te soecken en worsten, want zij alle die werelt doer om troost gevraecht hadden om te meijsteren. Ende soe hadden zij vijff iaer lanck gemeijstert. Ende hoe zij langer meijsterden, hoe het quader wort. Soe heeft die moeder haer oghen opgeslagen tot den hemel ende heeft Onse Lieven heer mit zijn ghebenedide moeder soe danich aengeroepen, off hij doch haer kijndt gesont maecken woude. Sie is in haer visioen gecoemen, dat zij mit dat kijndt haer bevaert t’Amersfoert loven soude mit gout ende silver ende dat kijndt laten te weghen mit wijn, mit weijt ende mit water. Hier nae is dat voerseijde kijndt gesont ende machtich geworden. Dit mirakel is geschiet Anno Domini XVe xLv.
