MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
539
Item daer was een knechtgen van Delft, dat gebroecken was vijff iaer lanck ende die ouders geen troost te soecken en worsten, want zij alle die werelt doer om troost gevraecht hadden om te meijsteren. Ende soe hadden zij vijff iaer lanck gemeijstert. Ende hoe zij langer meijsterden, hoe het quader wort. Soe heeft die moeder haer oghen opgeslagen tot den hemel ende heeft Onse Lieven heer mit zijn ghebenedide moeder soe danich aengeroepen, off hij doch haer kijndt gesont maecken woude. Sie is in haer visioen gecoemen, dat zij mit dat kijndt haer bevaert t’Amersfoert loven soude mit gout ende silver ende dat kijndt laten te weghen mit wijn, mit weijt ende mit water. Hier nae is dat voerseijde kijndt gesont ende machtich geworden. Dit mirakel is geschiet Anno Domini XVe xLv.
540
Item het was een maghet van xij iaer te Ingen, die gebroecken was vj iaer lankc ende soe hebben zij gedocht op die gratie Goedts ende loeffden dat beeldt t’Amersfoert te versuecken, te weghen dat kijndt mit weijt, mit wijn ende water ende haert offferhande te betalen, soe zij geloeft hadden. Hier nae terstont is zij gesont geworden nae die voerseijde beloften. Actum ut supra XVe xLv.
541
Item daer was een maghet van xvj iaeren van Gorcum, dat beseten was. Ende die ouders van dat voerseijde maechtgen beloeft hebben Onse L. Vrou te versuecken binnen Amersfoert, also zij dan gelovet hebben haer offerhande te betalen ende haer bedevaert te doen. Hier nae terstont is dat voerseijde maeisken door die genaden Goedts gesont ende machtich geworden. Actum ut supra Domini XVe xLv.
542
Item daer was een man van Amsterdam die xxij iaer lanck beseeten was. Soe is dat gevallen, datmen hem vermaenen soude binnen Amsterdam. Ende die Duvel daer niet en woude rumen. En soe heeft die Duvel den priester toegesproecken: “Ick en zall hier niet rumen, eer dat ghij mij t’Amersfoert voor dat Marien beeldt brengt.”Ende die voerseijde man oock tot hem selven qua m ende sprack: Ick wil mijn bedevaert loven voor Marien beelde binnen Amersfoert mit een pansser over mijn naecte lichaam van Amsterdam tot Amersfoert te dragen voor mariabeeldt. Dan hoep ick, dat God mit zijn ghebenedide Moeder mijn verlossen sullen.”Alsoe is deze voerseijde man t’Am ersfoert gecomen en doe hij quam op Onse L. Vrouwwen kerckhoff, doe bestont hij te roepen en te sprijnghen, dat hem vj mannen mit iiij vrouwen niet inde kerck chriegen en mochten. All sloepende hebben wij hem daer inne gechregen voor Marien beelde. Alsoe gerijnghe als hij bestreecken weert, soe valt hij neder ende quam tot hem selven. Ende doe jhij tot hem selven gecomen was, doe wouden zij hem op bueren, maer hij konde niet staen. Doe sprack hij: “Laet mij noch wat rusten.”Terstont is hij opgestaen ende is driewerff om die Cappel gegaen ende stack drie waschkeerssen aen. Doe sprack hij: “O Maria, hier offer iock mijn krucken tot een getuijchgenisse, dat ic verlost zijn ende ick en hoepse nemmermeer te besichgen, off geen creaturen.”Aldus heeft deze voerseijde man xxij iaer lanck op krucken gereden van Amsterdam off hier toe. Aldus heeft deze voerseijde man Onse Luieven Heer mit zijn ghebenedide moeder gedanckt ende is gesont ende machtig van hier gegaen int iaer ons Heeren XVe xLv.
